पाँचपोखरी नवलपुर जोड्ने मेलम्ची खोलाको अस्थायी पुल बगाएपछि आवातजावत ठप्प

असोज ३१, मेलम्ची । पाँचपोखरी र नवलपुर जोड्ने मेलम्ची खोलाको अस्थायी पुल बगाएको छ । गएराती आएको बाढीले अस्थायी ‘ह्युमपाइप पुल’ बगाएपछि पाँँचपोखरी थाङपाल गाउँपालिका, ईन्द्रावती गाउँपालिका तथा सदरमुकाम चौतारा पुग्नको लागि पुनः अवरुद्व भएको छ ।

गएरातीको भिषण वर्षाका कारण उक्त अस्थायी ‘ह्युमपाइप पुल’ बगाए संगै फेरी केहि समयको लागी यातायात तथा सर्वसाधारणका लागि आवतजावत बन्द भएको मेलम्चीका स्थानीय सिपी दुलालले जानकारी दिए । ‘बाढीले केही ह्युमपाइप बगाएको छ, केही दिन अवरुद्व हुन्छ’, दुलालले भने । तर ठूलो क्षति नभएकोले पानीको सतह घटेसंगै केही दिनमै सुचारु हुने उनले बताए ।

मेलम्ची बाढीले पुल नै बगाएर आवात जावात बन्द भएको पाँचपोखरी, मेलम्ची–शिखरपुर अस्थाई ’ह्युमपाइप’ राखिए पछि जोडिएको थियो । गत असार १ र १६ गते आएको बाढीले शिखरपुर जोडिने पुल बगाएको थियो । मेलम्चीबाट शिखरपुर हुँदै सदरमुकाम आईपुग्न प्रयोग भएको मोटरवेल पुल बाढीले बगाएपछि सर्वसाधारणलाई निकै सकस परेको थियो । हेलम्बु र मेलम्चीका सर्वसाधारणलाई राहदानी, नागरिकता तथा मालपोत कार्यालयमा सेवा लिन आउन उक्त पुल नहुँदा जिरोकिलो हँुदै आउन पर्ने वाध्यता थियो । तीनसाता अघि पूर्व सामाजिक विकास मन्त्री युवराज दुलालको सक्रियता र पहलमा ‘ह्युमपाइप पुल’ राखिएपछि यतायातका साधन लगाएत सर्वसाधारणलाई इन्द्रावती नदि पार गर्न सहज भएको थियो ।

अस्थायी ‘ह्युमपाइप पुल’ को लागी स्थानीय व्यापारी, विभिन्न संगठनमा आवद्व युवा, तथा पार्टीका कार्यकर्ता, सेना तथा प्रहरीको सहयोगमा निर्माण भएको थियो ।

पक्की मोटरवेल पुल लगाएत भौतिक संरचना निर्माणको लागि नेपाल सरकारले छिट्टै निर्माण गरिने बताएपनि अहिले सम्म बजेटको कुनै टुङ्गो लागेको छैन् । हेलम्बु र मेलम्चीमा आएको बाढीले यो क्षेत्रमा चारवटा मोटरवेल पुल तथा आधा दर्जन झोलङ्गे पुल बगाएको थियो ।
असारमा आएको विनासकारी बाढीले स्थानीयको व्यक्तिगत सम्पति बाहेक सडक, पुल लगाएत भौतिक संरचना अनुमानित डेड अर्ब भन्दा माथि क्षति पुगेको बताईन्छ ।