वडा स्तरीय भलिबलको उपाधी वडा नम्बर ४ कुबिण्डेलाई

अशोक पराजुली पुस 24/साँगाचाेक । जन जागृति भुपू विद्यार्थी मिलन समाजले आयोजना गरेको भलिबल प्रतियोगिताको उपाधी चौतारा साँगाचाेकगढी न.पा. वडा नम्बर ४ कुबिण्डेले जितेको छ ।

चौतारा साँगाचाेकगढी नगरपालिका वडा नम्बर १२ साँगाचाेकमा आयोजित नगर वडा स्तरीय खुला पुरुष भलिबल खेलमा वडा नम्बर ८ इर्खुलाई ३–१ को सेटमा हराउँदै वडा नम्बर ४ कुबिण्डेले उक्त पुरस्कार हात पारेको हो।

२५–१८, १८–२५, २५–२३ र १५–१२ को सेटमा वडा नम्बर ४ ले खेल जितेको हो । छ टिम सहभागी खेलको सेमिफाइनलमा वडा नम्बर ४ ले वडा नम्बर ११ र वडा नम्बर ८ ले वडा नम्बर १० को टिमलाई हराएर फाइनलमा पुगेका थिए ।

बिजेता टिमलाई नगद २५ हजार रुपैयाँ, ट्रफी र प्रमाणपत्र प्रदान गरिको छ । त्यस्तै उपविजेतालाई २० हजार रुपैयाँ, ट्रफी र प्रमाण पत्र प्रदान गरिएको खेल आयोजक मिलन समाजका सचिव प्रेम तामाङले बताए । सान्त्वना हुने वडा नम्बर १० लाई नगद १५ हजार प्रदान गरिएको छ।

खेल गत शुक्रबारदेखि लिक कम नकआउट नियमका आधारमा खेलाइएको थियो। पुराना भेट्रान खेलाडीको समेत सहभागिता रहेको खेल निकै रोचक रहेको थियो । विजेता खेलाडीलाई जन जागृति माध्यमिक बिद्यालयका प्रधानाध्यापक पदमप्रसाद पराजुलीले पुरस्कार प्रदान गरेका हुन्।