पाँचपोखरीको वडा कार्यालय आफ्नै सुविधा सम्पन्न भवनमा

थाङपालधाप । पाँचपोखरी गाउँपालिकाको ७ नम्बर वडा कार्यालयले आफ्नै सुविधा भवन पाएको छ । निर्माणको प्रक्रियामा रहेका पालिकाका वडा कार्यालयहरु मध्ये भोटेनाम्लाङमा रहेको ७ नम्बर वडाकार्यालयको पहिलो भवन बन्न सफल भएको हो । उक्त भवनको सोमबार गाउँपालिका अध्यक्ष टासी लामाले उद्घाटन गरेका हुन् । सोही दिन अध्यक्ष लामाले ७ नम्बर वडामै स्वास्थ्य केन्द्रको समेत शिल्यान्यास गरेका हुन् । जिल्ला समन्वय समिति र गाउँपालिकाको सहयोगमा वडा कार्यालय भवन र जिल्ला आयोजना कार्यान्वयन इकाई मार्फत साउदी अरबियाको आर्थिक सहयोगमा बन्ने सुविधा सम्पन्न स्वास्थ्य केन्द्रको शिलन्यास एकै साथ भएको हो । भवनको उद्घाटन तथा स्वास्थ्य केन्द्रको शिल्यान्यास पछि गाउँपालिकाका अध्यक्ष लामाले पाँचपोखरीमा अझैपनि बाल बिबाह नरोकिएको भन्दै बाल बिवाहको लागि शिफारिस नगर्न र सहभागि नहुन सबै जनप्रतिधिलाइ निर्देशन दिए । गाउँपालिकामा हुने बालबिबाहलाई निरुउत्साहित गर्न यस्तो निर्देशन दिईएको उनले बताए । गाउँपालिकाका अध्यक्ष लामाले भोटेनाम्लाङमा चौतर्फि विकास भइरहेको भन्दै गाउँपालिकाको पहिलो वडा कार्यालय भवन बन्न सफल भएकोमा खुशी व्यक्त गरे । गाउँपालिकाको बाँकी वडा कार्यालयहरु समेत क्रमशः निर्माणको प्रक्रियामा रहेको उनले जानकारी दिए । कार्यक्रम वडा अध्यक्ष सार्की तामाङको अध्यक्षतामा सम्पन्न भएको हो ।