माओवादी केन्द्रकाे महत्त्वपूर्ण निर्णय, केन्द्रीय समिति भंग, वामपन्थी एकताकाे पहल र निर्वाचनमा भाग लिने

असाेज १०, काठमाडौ । नेपाल कम्युनिस्ट पार्टी (माओवादी केन्द्र) को आठौँ केन्द्रीय समितिको सातौँ पूर्ण बैठक महत्त्वपूर्ण निर्णय गरि सम्मन्न भएकाे छ ।

अध्यक्ष पुष्पकमल दहाल ‘प्रचण्ड’ को अध्यक्षतामा सम्पन्न भएको बैठकले केन्द्रीय समिति भंग, वामपन्थी एकताकाे पहल र निर्वाचनमा भाग लिने लगाएत महत्त्वपूर्ण निर्णयहरू गर्दै सम्पन्न भएकाे छ ।

बैठकले अध्यक्ष प्रचण्डद्वारा प्रस्तुत प्रस्ताव पारित गरिनुकाे साथै वरिष्ठ उपाध्यक्ष नारायणकाजी श्रेष्ठ र उपमहासचिव जनार्दन शर्मा “प्रभाकर”ले प्रस्तुत गरेकाे पार्टी रूपान्तरण सम्बन्धी महत्वपूर्ण विषयहरू समावेश गर्ने साे पार्टीले जनाएकाे छ ।

बैठकले जेन–जी विद्रोहको भावनालाई सम्मान गर्दै पार्टीलाई शुद्धिकरण र पुनर्निर्माण गर्ने तथा पार्टीको केन्द्रीय समिति भंग गर्ने निर्णय गरेकाे छ ।
त्यस्तै आगामी मंसीर मसान्तभित्र पार्टीको विशेष महाधिवेशन गर्ने गरी प्रचण्ड संयोजक रहने गरी महाधिवेशन आयोजक समिति र आयोजक समितिको सचिवालय गठन गर्ने निर्णय गरेकाे छ ।

त्यस्तै विचार मिल्ने माओवादी धारा एवं वामपन्थी पार्टीहरूबीच एकता गर्ने, एकताको प्रक्रिया तत्काल अगाडि बढाई विशेष महाधिवेशनलाई एकता महाधिवेशनका रूपमा सम्पन्न गर्न जोड गर्ने तर, निर्धारित मितिभित्रै विशेष महाधिवेशन गर्ने साे पार्टीले जनाएकाे छ ।

यसैगरी अन्तरिम सरकारले घोषणा गरेको निर्वाचनका पक्षमा उभिँदै निर्वाचन सफल पार्न पार्टीको तर्फबाट भूमिका खेल्ने निर्णय समेत गरेकाे साे पार्टीकाे केन्द्रीय समितिकाे बैठकले फागुन २१ गतेको निर्वाचन हुन नदिने प्रवृत्तिका विरूद्ध संघर्ष गर्दै निर्वाचनका पक्षमा वातावरण बनाउने निर्णय गरेकाे जनाएकाे छ ।

माओेवादी केन्द्रले आसन्न निर्वाचनमा प्रत्यक्ष निर्वाचित कार्यकारी प्रमुखको मुद्दा उठाउने, समानुपातिक निर्वाचन प्रणालीका पक्षमा उभिने र विज्ञहरूबाट मन्त्री बन्ने कुरालाई राष्ट्रिय मुद्दाका रूपमा उठाउने समेत निर्णय गरेकाे पार्टीकाे केन्द्रीय महाधिवेशन आयाेजक समिति सदस्य माधव सापकोटाले जानकारी दिए ।

उनका अनुसार बैठकले पार्टीका नेताहरूको सम्पत्ति छानविन गर्न शक्तिशाली आयोग गठन गर्ने निर्णय गरेको छ। आयोगले जनस्तरबाट समेत सुझाव लिएर छानविनका आधारमा दोषीमाथि कार्वाहीको सिफारिस गर्ने समेत जनाएकाे छ ।

जेन–जी आन्दोलनले उठाएको “नेपोटिज्म”को विषयलाई पार्टीले गम्भीरतापूर्वक लिएको साे पार्टीको ठहर छ। बैठकले कार्यविधि बनाएर नेता–कार्यकर्ताका परिवारको जिम्मेवारी र जीवनशैलीबारे निर्णय लिने समेत जनाईएकाे छ ।

यस्ताे छ अन्य निर्णयहरू

– पार्टी केन्द्रीय कार्यालय र पार्टी नेताहरूको सचिवालयमा परिवारका सदस्यहरू नराख्ने र प्रविधिमैत्री जनशक्ति राख्नेबारे निर्णय भएको छ। महाधिवेशन आयोजक समितिको सचिवालयले कार्यविधि बनाएर उक्त निर्णय लागू गर्नेछ।

– पार्टीका सबै कमिटीहरूमा जेन–जीको प्रतिनिधित्व गराउने निर्णय गरेको छ। विशेष महाधिवेशनबाट पार्टी केन्द्रीय समितिमा युवाहरूको प्रतिनिधित्व बढाउने निर्णय भएको छ।

– नेतृत्व हस्तान्तरणको प्रश्नमा बैठकमा महत्वपूर्ण बहस भएको छ। बैठकले आगामी महाधिवेशनबाट विधिसम्मत ढंगले नेतृत्व विकास, हस्तान्तरण र पार्टीमा नयाँ क्रमभंग गर्ने।

– पार्टी कमिटीहरू प्रविधिमैत्री बनाउने, अभिलेखीकरणको काम व्यवस्थित गर्ने साे पार्टीको याेजना रहेकाे छ ।