अत्याधुनिक चौतारा अस्पतालको प्रधानमन्त्री प्रचण्डले उदघाटन गर्ने
जेठ १६, (२०८१) चौतारा । सिन्धुपाल्चोक जिल्लाको सदरमुकाम चौतारा स्थित अत्याधुनिक अस्पतालको बुधबार उदघाटन गरिने भएको छ । मित्रराष्ट्र चीनको सहयोगमा निर्माण सम्पन्न उक्त भवनको प्रधानमन्त्री पुष्पकमल दाहाल ‘प्रचण्ड’ ले एक समारोहबीच उदघाटन गर्ने भएका छन् ।
२०७२ सालको विनाशकारी भूकम्पमा ध्वस्त अस्पताल पुनर्निर्माणमा चीन सरकारको ६ करोड १० लाख चिनियाँ युआन (आरएमबी) अनुदान सहयोगमा निर्माण भएको हो । ९ सेप्टेम्बर २०२२ मा निर्माण सुरु भएको चाइना एड सिन्धुपाल्चोक हस्पिटल रिकभरी प्रोजेक्ट इन नेपाल करिब १८ महिनाको छोटो अवधिमा निर्माण कार्य सम्पन्न भएको हो ।
चौतारा अस्पतालका मेडिकल सुपरिटेण्डेट डा. रुद्रमणि भण्डारीका अनुसार अस्पताल भवन निर्माणका लागि सन् २०१८ अगष्ट १५ मा चीनको अर्थ मन्त्रालय अन्तर्गत एजेन्सी फर इन्टरनेशनल इकोनोमिक को–अपरेसन र नेपाल सरकार स्वास्थ्य तथा जनसंख्या मन्त्रालयबीच काठमाडौंमा सम्झौता भएको थियो ।
अस्पतालका अनुसार ५० शैयको सुविधा सम्पन्न अत्याधुनिक अस्पताल सेवाका लागि सम्पूर्णरुपमा तयार भईसकेका छन् । मेडिकल कम्प्लेक्स बिल्डिङ ९३ स्टोरिज, वाटरपम्प रुम, टेम्पोररी मेडिकल वेस्टेज रुम, जेनेरेटर सेड निर्माणसँगै मेडिकल उपकरण, फर्निचर र अस्पतालका लागि आवश्यक सर्जिकल सामग्री चीन सरकारले नै उपलब्ध गराएको हो । भ्याक्सिनेसन सेन्टर, पुलिस अफिस, फायर कन्ट्रोल सेन्टर, क्षयरोग र एड्स उपचार कक्ष पनि तयार भएका छन् ।
भुइँतलामा चार सय ५० केभी पावरको जेनेरेटर र मेडिकल वेस्ट वाटर प्रोसेसिङ उपकरण पनि जडान गरिएको छ । त्यस्तै फार्मेसी, दर्ता शाखा, परामर्श कक्ष, फिजियोथेरापी पुनर्वास कक्ष, पोषण भान्सा, ड्युटी रुम, बहिरंग बिरामी कक्ष, बालबालिका कक्ष, प्रयोगशाला, आकस्मिक कक्ष, नर्सिङ स्टेसन, ड्रेसिङ रुम, एक्सरे र भिडियो एक्सरे कक्ष पनि तयार भएका छन् ।
पहिलो तलामा नर्सिङ स्टेसन, २९ शैयाको अन्तरंग विभाग, क्लासरुम, सात शैयाको प्रसूति विभाग, दुई अपरेटिङ कक्ष, रिकभरी कक्ष, नवजात शिशु स्याहार मेसिन, फोटोथेरापी उपकरण, बालबालिका उपचार कक्ष, पुरुष र महिलाका लागि छुट्टाछुट्टै ड्रेसिङ कक्ष, मेडिकल स्टाफ आराम कक्ष छन् ।
त्यस्तै दोस्रो तलामा प्रशासनिक कार्यालय, तालिम हल, गतिविधि कक्ष, अप्रेसन डिपार्ट, पुस्तकालय, सम्मेलन रुम, अस्पताल निर्देशक कक्ष र मेडिकल डकुमेन्ट रुम छन् । तेस्रो तलामा पानी प्रशोधन कक्ष जहाँ कार्बन र बालुवा फिल्टर मेसिन छन् । अप्रेसन कक्षका लागि स्वच्छ हावा तयार पार्ने मेसिन र दुईवटा ठूला लुगाधुने मेसिन राखिएका छन् ।
सबै तलामा अत्याधुनिक अपरेटिङ सिस्टम जडान गरिएको छ । नेपाल सरकारलाई औपचारिक रुपमा हस्तान्तरण गरेपछि पनि आगामी तीन वर्षसम्म चिनियाँ प्राविधिक टोली अस्पतालमै रहने अस्पताल स्रोतले जनाएको छ । उनीहरूले मेसिन र अपरेटिङ सिस्टम सिकाउने बताइएको छ । भूकम्पपछि ध्वस्त चौतारा अस्पतालले करिब पाँच वर्ष टेण्टमा बिरामीको उपचार गरेको थियो । त्यसपछि बनाइएको अस्थायी संरचना प्रिफायब भवनभित्रबाट सेवा सञ्चालन हुँदै आएको छ ।
यसैबीच जेठ १६ गते दिउँसो १.०० बजे चौतारा अस्पताल उदघाटन कार्यक्रमको प्रमुख अतिथी पार्टी अध्यक्ष एबम प्रधानमन्त्री पुस्पकमल दाहाल ‘प्रचण्ड’ आउने भएपछि नेकपा (माओवादी केन्द्र) सिन्धुपाल्चोकले नजिकका पालिकाहरुबाट आफ्ना पार्टी कार्यकर्ता तथा शुभचिन्तकहरुलाई कार्यक्रममा आउन आह्वान गरिएको माओवादी केन्द्रका जिल्ला संयोजक गोविन्द पराजुली अविनाशले जानकारी दिए ।
