६ वर्ष पछि दोस्रो प्रयासमा बुद्वराजले गरे ह्याट्रिक
दिनेश दुलाल
चैत्र ११, बाह्रबिसे । उद्योगी, व्यापारी व्यवसायीहरुको छाता संगठन सिन्धुपाल्चोक उद्योग वाणिज्य संघमा बुद्वराज बस्नेत विजयी भएका छन् ।
चैत्र ९ र १० गते बाह्रबिसेमा भएको संघको ११ अधिवेशनमा भएको मतदान प्रक्रियामा बस्नेतले जित हाँसिल गरेका हुन् । बस्नेतले दुई प्रतिश्पर्धी सुमन खत्री र शम्भुबहादुर तिमिल्सिनालाई पछि पार्दै विजयी बन्न सफल भएका छन् ।
१९१९ जम्मा मत खसेकोमा बस्नेतले ९०४ मत ल्याई २२० मतान्तरले उनका प्रतिद्वन्दी सुमन खत्रीलाई पराजित गरेका हुन् । खत्रीले ६८४ मत ल्याएका थिए । अर्का प्रतिश्पर्धी शम्भुबहादुर तिमिलिसनाले २९७ मत ल्याएर तेस्रो भएका छन् । विजयी बनेका बुद्वराज संघको ८ औं अधिवेशनमा कमलकुमार श्रेष्ठसंग पराजित भएका थिए । बस्नेत ६ बर्ष पछि दोस्रो प्रयासमा संघको अध्यक्षमा पुग्न सफल भएका छन् ।
यसैगरी पदाधिकारी तर्फ बरिष्ठ उपाध्यक्षमा उमेश प्रधान विजयी बन्न सफल भएका छन् । प्रधानले ८११ मत ल्याएर अर्का प्रतिद्वन्दी सूर्यबहादुर कार्कीलाई ११८ मतान्तरणले पछि पार्दै जित हाँसिल गरेका हुन् । कार्कीले ६९३ मत ल्याएका थिए । तेस्रोमा भने विदुर पराजुली भएका छन् । उनले जम्मा ३४६ मात्रै मत प्राप्त गरेका थिए ।
यसैगरी द्वितीय उपाध्यक्षको लागि भएको चनावी प्रतिश्पर्धामा ईन्द्रबहादुर राउतले जित हाँसिल गर्न सफल भएका छन् । उनका प्रतिद्वन्दी राजेश श्रेष्ठलाई २५५ मतान्तरले पछि पार्दै जित हाँसिल गरेका हुन् । राउतले १०५२ मत ल्याउँदा श्रेष्ठले ७९७ मत ल्याएका थिए ।
