सिन्धुपाल्चोकमा पनि यसरी मनाइयो अन्तर्राष्ट्रिय आदिवासी जनजाति दिवस

साउन २४, चौतारा । अन्तर्राष्ट्रिय आदिवासी जनजाति दिवस आज विभिन्न कार्यक्रम गरी मनाइएको छ ।
यस वर्ष देशभरि विभिन्न कार्यक्रम गरी यो दिवस मनाइरहँदा सिन्धुपाल्चोकका पनि आदिवासी जनजातीहरुले विविध कार्यक्रम गरी यो दिवस मनाएका छन् ।

आफूले निर्धारण गरे अनुरूपको ‘परविर्तनको संवाहक आदिवासी युवाहरू’ भन्ने मुल नाराका साथ सिन्धुपाल्चोक जिल्लाको सदरमुकाम चौतारामा प्रदेश सांसद माईली तामाङको प्रमुख आतिथ्य तथा चौतारा साँगाचोकगढी नगरपालिका ५ नम्बर वडाअध्यक्ष शिव श्रेष्ठको विशेष आतिथ्यतामा गरिएको नेपाल आदिवासी जनजाति महासंघ सिन्धुपाल्चोक शाखाले जनाएको छ ।

दिवसका अवसरमा सदरमुकाम चौतारा बजारमा ¥याली समेत गरी औपचारिक कार्यक्रम गरिएको हो । कार्यक्रममा बागमति प्रदेश सांसद माइली तामाङले आदिवासी युवाको सक्रियता र सशक्तिकरणमा विशेष जोड दिदै कार्यक्रम औचित्यपूर्ण रहेको धारणा राखिन । ५ नम्बर वडाअध्यक्ष शिव श्रेष्ठले आदिवासी जनजातीहरु आफ्नो हकअधिकारको लागि संधै एकजुट भएर अघि बढ्नुपर्ने सुझाब दिए ।
सन् १९९४ डिसेम्बर २३ को संयुक्त राष्ट्रसङ्घको साधारणसभाले अगस्त ९ तारिखलाई अन्तर्राष्ट्रिय आदिवासी दिवसका रूपमा मनाउने अवधारणा अगाडि बढाएको हो ।

संयुक्त राष्ट्रसङ्घले यसअघि नै सन् १९९४ देखि सन् २००४ सम्म आदिवासी दशकका रूपमा ‘कर्म र मर्यादाका लागि दशक’ नाराका साथ आह्वान गरेको थियो ।
यसैबीच उक्त कार्यक्रमको अवसरमा आदिवासी जनजाती माहासंघ सिन्धुपाल्चोकले सञ्चारकर्मी कमला पाख्रिनलाई सम्मान गरेको छ । पाख्रिन कान्तिपुर टेलिभिजनकी सिन्धुपाल्चोक संवाददाता हुन् ।