सिन्धुपाल्चोकमा चोरीका घटना वृद्वि, गएराती ठूलोसिरुवारीमा ३ सहकारी र २ पसल चोरी
दिनेश दुलाल
बैशाख १२, (२०८०) चौतारा । सिन्धुपाल्चोकमा एकै पटक आधा दर्जन चोरीका घटना भएपछि सिन्धुपाल्चोकबासी त्रसित भएका छन् । भोटेकोशी गाउँपालिकामा चोरीका घटना भएको केही साता नवित्दै सदरमुकाम नजिकै रहेको ठूलोसिरुवारीमा गएराती ३ सहकारी, २ पसल र एक विद्यालय समेत एकै पटक चोरी भएपछि स्थानीय त्रसित बनेका हुन् ।
सोमबार राती चौतारा साँगाचोकगढी नगरपालिका वडा नम्बर १३ ठूलोसिरुवारीमा रहेको समाज रुपान्तरण बचत तथा ऋण सहकारी संस्था लि.बाट १२ लाख ७० हजार र सोही वडाको नर्सिङ डाडाँमा रहेको आलोपालो बहुउद्देश्य बचत तथा ऋण सहकारी संस्था लि. बाट ३ लाख १९ हजार चोरी भएको त्याहाँका स्थानीयले बताएका छन् ।
समाज रुपान्तरणको काउन्टरबाट ७० हजार चोरी भएको तर सेफमा राखिएको १२ लाख भने सेफको साँचो नभेटिएकोले एकिन नभएको समाज रुपान्तरणका अध्यक्ष टीकाबहादुर श्रेष्ठले जानकारी दिए । सेफ खोल्न काठमाडौंबाट प्राविधिक मगाईसकिएकोले बेलुका सम्म चारी भएको रकमको एकिन विवरण आउने उनले बताए । उनका अनुसार चोरले सहकारीको मुल ढोका खोली दराज लगाएत ठाउँहरु फुटाएको थियो । सोमबार कर्मचारीले सेफको साँचो सहकारीको अफिसमै छाडिएको उनले बताए ।
यस्तै सोही राति आलोपालो सहकारीको काउन्टरबाट ७१ हजार ८ सय ८०, मल बिक्रीबाट आएको रकम ४७ हजार ७ सय ५० र झोलामा राखिएको २ लाख गरी ३ लाख १९ हजार ८ सय ८० रुपैंया चोरी भएको आलोपालो सहकारीका प्रवन्धक लिलाबहादुर गिरी ‘सन्तोष’ ले जानकारी दिए । उनका अनुसार चोरले सिसि क्यामारा तोडफोड गरी मुल ढोका फोरेको थियो ।
त्यस्तै सोही राती नर्सिङडाँडामा लालबहादुर श्रेष्ठको मासु पसलबाट ९ हजार ५ सय र सोहीका सूर्यबहादुर तामाङको पसलबाट ९ हजार रकम र सुनको मुन्द्रा चोरी भएको स्थानीय सूर्यबहादुर श्रेष्ठले जानकारी दिए । त्यस्तै सोही राती साना किसान कृषि सहकारी र विपि आधारभुत विद्यालय तोडफोड भएपनि धनमाल भने केही नभएको विपि आधारभूतका प्रध्यानध्यापक प्रकाश गिरीले जानकारी दिए ।
चोरी भएका दुवै सहकारीले जिल्ला प्रहरी कार्यालय सिन्धुपाल्चोकमा मंगलबार दिउसो उजुरी दिएका छन् । घटना स्थलमा बिहानै प्रहरी प्रमुख सहितको टोली गएको थियो । घटनालाई शुष्म अध्यायन थालि अनुसन्धान भईरहेको जिल्ला प्रहरी कार्यालयका प्रहरी उपरिक्षक बालनरसिंह राणाले जानकारी दिए । स्मरण रहोस एकसाता अघि मात्रै भोटेकोशी गाउँपालिकामा चोरीको घटना भएको थियो ।
