स्वतन्त्र पार्टीप्रति जनआकर्षण बढ्दै, रविको भाषण सुन्न क्षणभरमै जनताको ओईरो

असोज ८, चौतारा (सिन्धुपाल्चोक) । जिल्लाको सदरमुकाम बजार शनिबार सुनसान थियो । टुँडिखेल नजिकै पिपलबोटमा खुत्रुके व्यापारीहरु व्यापार नहुने भएसी ठाउँ छाडेका थिए ।
सुनसान टुँडिखेलमा एकाएक मान्छे जम्मा हुन थाले । एकैछिनमा पिपलबोटमा सर्वसाधारण जनताको भरिभराउ भयो । त्यहाँ कुनै राजनैतिक दलद्वारा आयोजना गरिएको कार्यक्रम थिएन । न त राजनैतिक दलहरुको सभा हुनु अघि सजिसजाउ गरिएको जस्तो मञ्च नै थियो । बिना प्रचार र बिना तामझाम सदरमुकाम वरपरबाट सुनेको भरमा सर्वसाधारण ओईरिएका थिए ।

लमतन्न शरिर, कालो रङको सर्ट पाईन्ट लगाएका उनै न्युज ट्वान्टी फोरका कार्यक्रम पूर्व सञ्चालक रवि लामिछाने टुप्लुक्क मन्च अगाडि देखा परे । राष्ट्रिय स्वतन्त्र पार्टीको पार्टीका केन्द्रिय सभापति रहेका उनै रवि लामिछाने मञ्च अगाडि निस्किए । मन्चमा न अतिथिहरुको भरिभराउ थियो, न फुलमलाले सजिसजाउ नै थिए । अतिथि पनि सर्वसाधारण बसेकै ठाउँमा बसेका थिए ।

कार्यक्रमका प्रमुख अतिथि रहेका रवि लामिछानेले देशलाई अहिले ठूला भनिएका दलहरूले बर्बादी बनाएकोले देशलाई जोगाउन सबै जनताले आफ्नो मत परिवर्तन गर्नुपर्ने धारणा राखे । पुराना पुस्ताका नेता र पुराना दलहरूबाट अब कुनै परिवर्तनको आश गर्न नसकिने भन्दै लामिछानेले जनताले राष्ट्रिय स्वतन्त्र पार्टीका उम्मेदवारलाई जिताउन आग्रह गरे । कार्यक्रममा सहभागी स्थानीयले समेत आफ्नो धारणा समेत राखेका थिए । राजनैतिक दलबाट मुलुकको लागि कुनै परिवर्तन नहुने देखेर सर्वसाधारण जनताको स्वतन्त्र पार्टीप्रति आकर्षण देखिएको एक सभागीले बताए ।

यसैबीच सोही कार्यक्रमबाट राष्ट्रिय स्वतन्त्र पार्टी, सिन्धुपाल्चोकको सभापति पदमा माया गुरुङ चयन भएकी छिन् । शनिबार चौतारामा भएको पार्टीको जिल्ला भेलाले गुरुङलाई सभापति चयन गरेको हो ।

भेलाले उपसभापतिमा पासाङ तामाङ र सचिवमा चक्रपाणी सिग्देल चयन गरेको छ । तीन जना पदाधिकारी सहित जिल्लाका सबै स्थानीय तहका कमिटी सभापति पदेन सदस्य रहने पार्टीको विधान अनुसार तीन जना पदाधिकारी चयन गरिएको सो पार्टीले जनाएको छ ।