एमालेलाई नवौं जिल्ला अधिवेशनको चटारो, नेतृत्व व्यवस्थापनमै चुनौति

दिनेश दुलाल
बाह्रबिसे (सिन्धुपाल्चोक) । नेकपा (एमाले) सिन्धुपाल्चोकलाई यतिबेला नवौं जिल्ला अधिवेशनले छपक्कै छोपेको छ ।
जिल्लाको प्रमुख व्यापारिक केन्द्र बाह्रबिसे बजारमा हुने लागेको जिल्ला अधिवेशन आउन १ दिन बाकी रहँदा नेता कार्यकर्तामा छुट्टै रौनकता छाएको छ । पुष २३ गते शुक्रबार बाह्रविसेमा गर्ने जिल्ला अधिवेशनको तयारीको लागि आजै देखि नेता कार्यकर्ता अधिवेशनको अन्तिम तयारीमा जुटेको सो पार्टीले जनाएको छ ।

भोली देखि हुने अधिवेशनको उद्घाटन सत्र सकेर बन्दसत्र पछि मात्रै पदाधिकारी तथा सदस्यहरुको मनोनयन दर्ता प्रक्रिया सुरु हुने जनाईए पनि केही दिन देखि जिल्ला अध्यक्ष लगाएत पदाधिकारीको चर्चा चल्न थालेको छ । केहीले भने अध्यक्ष पदमा उम्मेदवारी दिने घोषणा समेत गरिसकेका छन् । यसले एमालेमा जिल्ला नेतृत्व सहज रुपमा छान्न मुश्किल पर्ने विश्लेषकहरु बताउँछन् । सिन्धुपाल्चोकमा एमाले सहमतिमा नभई चुनावी प्रक्रियामा जान सक्ने आकलन गरिएको छ ।

हाल चर्चामा रहेका जिल्ला अध्यक्षका आकांक्षीहरु तीनजना गाउँपालिका अध्यक्ष र एकजना जिल्ला पार्टीका सहसंयोजक समेत छन् । एमाले पार्टीका पुराना नेताका रुपमा रहेका कमल नेपाल, केदार क्षेत्री र होमनारायण श्रेष्ठ गाउँपालिका अध्यक्ष हुन् भने बालकृष्ण देउजा पार्टीको जिल्ला सहसंयोजक हुन् ।
जिल्ला पार्टीको सचिव भईसकेका नेपालले जिल्ला अध्यक्ष झम्क नेपालले पुनः नदोहोरिने संकेत दिएसंगै आफू स्वतः अध्यक्षको दावेदार भएको बताउँछन् ।

त्यस्तै लामो समय पार्टीको सचिवालय सदस्य रहेका केदार क्षेत्रीको पनि अध्यक्षको लागि उति नै दावी गरेका छन् । उनले केन्द्रीय माहाधिवेशनमा केन्द्रीय सदस्यको उम्मेदवारी दिने घोषणा गरेपनि पछि हटेका थिए ।
नेपाल र क्षेत्री एउटै पार्टी रहँदा उनीहरु माधव नेपाल गुटका हुन् । त्यस्तै देउजा र श्रेष्ठ भने ओली गुटका हुन् । यसअघि सिन्धुपाल्चोकमा ओली भन्दा माधव गुट बलियो थियो ।

यद्यपि माधव नेपाल पक्षको सानो समुह चोईटिएर नेकपा (एकिकृत समाजवादी) बनेसंगै सिन्धुपाल्चोकमा सिंगो एमाले बनेको हो । १० बँुदे सहमतिका आधारमा बनेको एमालेमा पूर्व गुटको पुरानै धङधङी बाँकी रहेकाले त्यसको प्रभाव यो माहाधिवेशन सम्म प्रत्यक्ष पर्ने राजनैतिक जानकारहरु बताउँछन् । पुरानै समिकरण कायम रहे पूर्व नेपाल गुटका भनेर चिनिएका अनुहार मध्येबाटै अध्यक्ष निर्वाचित हुन सक्ने एमालेका एक जिल्ला नेताले सिन्धुज्वालालाई बताए ।

जिल्लाका प्रभावशाली नेता पूर्व सांसद सुभाष कर्माचार्य केही दिन अघि मात्र एमाले परित्याग गरिसकेकाले त्यसको केही असर पर्न सक्ने ती नेताको ठम्याई छ । उनी नेपाल र क्षेत्री समुहकै हुन् ।

यस्तो छ दुई खेमाको आ–आफ्नै समिकरण

ओली पक्षबाट जिल्ला अधिवेशनको अध्यक्षको दाबेदार रहेका होम नारायण श्रेष्ठ र बालकृष्ण देउजा मैदानमा उत्रिने भएका छन् । अन्ततः दुईमध्य एकजनालाई समर्थन गरेर भिड्न सक्ने स्रोतको दावी छ । उनीहरुको टिममा सचिवमा जेपी सिलवाल, चन्द्र थिङ र बिष्णुमणी आचार्य देखिएका छन् ।

त्यस्तै पूर्व नेपाल समुह अर्थात १० बँुदे समुहबाट जिल्ला अध्यक्षका दाबेदार कमल नेपाल र केदार क्षेत्री मैदानमा उत्रिने भएका छन् । यता पनि दुई मध्य एकजनालाई समर्थन गरेर भिड्न सक्ने स्रोतको दावी छ । उनीहरुको टिममा उपाध्यक्ष जरा लामा, सचिव कृष्ण गोपाल तामाङ, सोम बम्जन र ईन्द्र तामाङ देखिएका छन् ।

यद्यपि संगठन विभागले उमेदवारको हदबन्दी तोकेका कारण पुराना नेता बाहेक पदाधिकारीको लागि चर्चामा आएका नयाँ अनुहारको सन्दर्भमा फेरबदल हुनसक्ने एमालेका जिल्ला तहका एक नेताले ठोकुवा गरे ।

उनका अनुसार सामाजिक संजालमार्फत उमेदवार घोषणा गरेका केही नयाँ अनुहारहरुको हकमा एमाले संगठन विभागले जिल्ला सदस्य र पदाधिकारी उमेदवारको मापदण्ड तोके पछि समिकरणमा फेरबदल हुने देखिएको हो । संगठन विभागले तोकेको हदबन्दी अनुसार पदाधिकारीको लागि दुई कार्यकाल जिल्ला कमिटी सदस्य भई काम गरेको वा एक कार्यकाल सचिवालयमा काम गरेको हुनुपर्ने उल्लेख छ ।
त्यस्तै जिल्ला कमिटी सदस्यको हकमा जिल्ला कमिटी, जिल्ला कमिटीको विभाग वा सो भन्दा तल्लो कमिटीमा एक कार्यकाल अनिवार्य काम गरेको हुनुपर्ने उल्लेख छ । तर एकता प्रक्रियामा समाहित भएकाहरुको हकमा भने विधानको धारा ६३ को(११) अनुसार हुने विभागको ठहर छ ।

एमाले सिन्धुपाल्चोकको नवौं अधिवेशनबाट १०५ सदस्यीय जिल्ला कमिटी बन्ने सो पार्टीले जनाएको छ । जिल्लामा सो पार्टीको १५ हजार भन्दा माथि संगठित सदस्य रहेको बताईन्छ ।