सदाबहारको पोल्टामा फाइनलको उपाधि
अशोक पराजुली
१३, लामोसाँघु (सिन्धुपाल्चोक ) । ए डिभिजन जिल्ला फुटबल लिगको उपाधि न्यू सदाबहार युवा क्लब खाडिचौरले आफ्नो पोल्टामा पार्न सफल भएको छ । साँगाचोक युवा क्लब साँगाचोकलाई ४-० ले पराजित गर्दै जिल्ला लिग उपाधि जित्न सफल भएको हो ।
गत पौष ५ गतेबाट लामोसाँघु स्थित बसन्तपुर खेलमैदानमा सिन्धुपाल्चोक जिल्ला फूटबल संघको आयोजना, क्षमादेवी ग्रुपको मुख्य प्रायोजन,बलेफी र लिसंखुपाखर गाउँपालिका, सिन्धुपाल्चोक उद्योग बाणिज्य संघ,ब्ल्याक हर्स सुजको सहयोग र अखिल नेपाल फुटबल संघ( एन्फा )को प्राविधिक सहयोगमा संचालन भएको उक्त खेलमा सिन्धुपाल्चोकबाट ८ क्लबको सहभागिता रहेको थियो ।
उक्त प्रतियोगिताको फाइनल खेलमा पहिलो हाफमा सदाबहारले १ गोल गरेको थियो । निकै नै प्रतिस्पर्धात्मक देखिएको खेलको दोस्रो हाफ पछि भने साँगाचोकका खेलाडीको खेल निकै नै फितलो रह्यो । दोस्रो हाफमा सदाबहारले ३ गोल गरे सँगै खेल सदाबहारले ४-० को गोल अन्तरमा जित हात पार्न सफल भयो ।
प्रतियोगितामा प्रथम बिजयी टिमलाई नगद एक लाख ११ हजार एक सय ११,ट्रफी,मेडल र प्रमाणपत्र प्रदान गरिएको थियो भने दोश्रो हुने उप बिजेता टीमलाई नगद ५५ हजार पाँच सय ५५,मेडल र प्रमाणपत्र प्रदान गरिएको थियो र प्रत्येक खेलमा सहभागी भई बिजयी हुने टीमलाई तीन हजार टोकन मनी उपलब्ध गराइएको थियो ।
अब प्रदेश लिगमा न्यू सदाबहार युवा क्लबले जिल्लाको प्रतिनिधित्व गर्दै खेल खेल्नेछ । पुरस्कार वितरण कार्यक्रम एन्फा सिन्धुपाल्चोकका अध्यक्ष मनकुमार श्रेष्ठको सभापतित्व तथा एन्फाका केन्द्रिय अध्यक्ष कर्मा छिरिङ्ग शेर्पाको प्रमुख आतिथ्यतामा भएको थियो ।
